|
|
| Ofurátök á Indlandi |  OFURÁTÖK Á INDLANDI
Af hvítu hörundi hins norræna víkings þeyttust svitadroparnir út í kæfandi loftið. Æðarnar tútnuðu út og hver sin og hver taug var þönd til hins ítrasta. Vöðvarnir nötruðu þegar heljarþungt fargið lyftist hægt og hægt frá gólfinu...Aldrei hafði nokkur maður einn getað bifað þessari styttu... þangað til núna að Ofsinn frá Íslandi tók á henni...Áhorfendur voru stjarfir. Aldrei höfðu þeir séð annað eins...
Stundin var borgin Delhi á Indlandi í september mánuði 1994. Nokkur hópur íslendinga var þarna staddur á Heimsmeistaramóti unglinga í kraftlyftingum. Þarna voru þeir Jóhannes Eiríksson Omegakraftur Auðunn Jónsson og svo hinn skrautlegi Ofsi Völundur Þorbjörnsson sem keppendur, en í gæðaúrvali aðstoðarmanna voru þeir: Gunnar Ólafsson bart og verðandi Skemmujarl og Grétar Hrafnsson griss. Þeir dvöldu í landinu í rúmlega viku innan um fátækt, ólykt, skít og heilagar rottur. Hvar sem hópurinn fór vakti hann mikla athygli en Grissinn þó mesta þar sem strákarnir kynntu hann jafnan sem heimsmeistara... Trúðu indverjarnir því þótt Griss væri á þessum tíma jafnvel meiri fitularfur en flæðimassi. Grissinn fílaði þetta í botn og var hinn glaðbeittasti og gleymdi því alveg að hann ætti 500 í totali...
Einn daginn var farið í verslunarleiðangur. Rákust þeir þá á gamla og stóra minjagripaverslun. Þar inni sá Ofsinn stærðar líkneski af fíl höggvið í dökkan harðvið. Var þetta glæsilegur gripur og greinilega mjög þungur. Kaupmaðurinn sem var örmjór tittur með slungið augnaráð sá í Ofsanum einhverja veiðivon og sagði líkneskið kosta 50.000 dollara. Það var auðvitað fullmikill biti að kyngja svo Ofsinn spurði hvort hann mætti bara ekki eiga styttuna ef hann gæti borið hana út úr búðinni? Slynga augnaráðið brosti nú góðlátlega og sagði að það hafi þurft 6 menn til að bera líkneskið inn í búðina en honum væri velkomið að reyna að vinna til þess að eignast fílinn...
Ofsinn gekk að þessu tilboði undir glottuleitum indverjunum sem komu þarna að eins og flugur að ljósi til að fylgjast með...Þá erum við komin að upphafi þessarar sögu þegar Ofsinn Völundur Þorbjörnsson barðist hatrammlega við að lyfta styttunni...Eftir nokkurn tíma og heljarátök kom hann fílnum vel yfir hné...Brosin á indverjunum fölnuðu og angistarsvipur færðist yfir tálgað andlit kaupmannsins. Í sama mund og Ofsinn ætlaði að labba af stað með styttuna missti hann takið og varð að láta hana niður aftur. Þegar ákafur Ofsinn gerði sig líklegan í aðra tilraun fór kaupmaðurinn að babla eitthvað óðamála á mun verri ensku en áður...Skilja mátti að tilboðið góða stæði ekki lengur. Í þess stað gaf hann Ofsanum litla útgáfu af styttunni og kvaddi svo íslendingana með virktum og þótti mikið til þessarar heimsóknar koma.
Þegar strákarnir löbbuðu út úr búðinni sagði Ofsinn þeim að hann hefði alveg getað tekið styttuna... Hann hefði bara séð að í raun og veru hefði verið alltof mikið mál að koma henni heim til klakans...!
| | Hugleiing: KE | Heimild Sir Magister Cat | Dags. 8---0-2005 |
|
|
