|
|
| SÍÐASTA LYFTINGAÆFING BUBBA MORTHENS |  Bubbi Morthens æfði lyftingar í Ármannsheimilinu við Sigtún kringum árin 1978-79. Á þessum tíma æfði Magister oft með honum undir stjórn lyftingameistarans Guðmundar Sigurðssonar. Þegar þessi saga gerist bjó Bubbi ásamt sambýliskonu sinni Bogey Hreiðarsdóttur heima hjá Guðmundi og Hrönn konu hans í Miðtúni í u.þ.b. hálft ár eða svo. ( 5 ára samband sitt við Bogey sem var fyrsta konan sem Bubbi bjó með og dvölina heima hjá Gvendi hefur Bubba láðst að geta við ævisagnaritara sína, hvernig sem á því stendur!)
Bæði Bubbi og Kári Elís. (Magister Cat) nutu leiðsagnar Gvendar í hvívetna bæði til lyftinga og andlegra framfara. Bubbi þótti nokkuð gott efni í lyftingum og sýndi mikinn áhuga og skemmtilega takta. Hann var þá þegar farinn að spila talsvert á gítar og syngja og var aðalmaðurinn í partýum heima hjá Gvendi. Og nokkur laga hans á Ísbjarnablús samdi hann að einhverju leyti í Miðtúninu.
Einn sunnudaginn voru þeir mættir á lyftingaæfingu, Bubbi og Magister. Þeir voru bara tveir einir á æfingu en þeim svall mikill eldmóður í brjósti. Bubbi var skelþunnur eftir ævintýri næturinnar en var engu að síður í miklu stuði. Áður en átök hófust lýsti Bubbi því yfir við Magister að hann ætlaði að lyfta óheyrilegum þyngdum í framtíðinni og verða bestur í lyftingum og músik..Hæverskum Magister svelgdist á sportdrykknum. Þetta leit út fyrir að ætla verða spennandi æfing. Bubbi byrjaði síðan á léttri upphitun með 50kg í snörun, eða talsvert frá yfirlýsingatölum skömmu áður. Sennilega sökum þynnkunnar, mistókst þessi fyrsta lyfta svo herfilega að lóðin sem voru úr járni skullu niður á annan fót hans. Bubbi rak upp skaðræðisvein sem hræddi allar gamlar kerlingar í nágrenninu. Hann fann gífurlega til og ljóst að stóratáin var í köku, í það minnsta..Lauk þessari æfingu þar með.
Bubbi var lítt ferðafær sökum þessa og varð að ráði að Magister skyldi bera hina emjandi hetju heim í Miðtún. Magister tók nú Bubba á bakið og bar hann sem leið lá yfir fjöll og firnindi og allan fótboltavöllinn, og heim til Gvendar. Þetta var með meiri þrekraunum sem Magister hafði lent í...Bubbi var nokkurn tíma að jafna sig á meiðslunum. Á meðan æfði hann sig sem mest í tónlistinni og fór undirbúa útkomu fyrstu plötu sinnar, Ísbjarnablús..Það fór svo að Bubbi lyfti ekki meira fyrr en að mörgum árum liðnum því platan sló í gegn og framhaldið þekkja allir.. | | Hugleiing: K-E | Heimild Magister Cat | Dags. 1---0-2005 |
|
|
