|
|
| Vígamóður í vöruskemmu |  Kringum árið 2000 átti Ofsinn Völundur Þorbjörnsson risastóra vöruskemmu í Hafnarfirði.
Þar bjuggu um skeið m.a. þeir Gunnar Ólafsson sem fékk nafnið Skemmujarlinn á þessum tíma og Egill sterki en það var grútmáttlaus norðmaður sem var einkavinur jarlsins. Einnig var þarna arabi einn sem kallaður var Kalli. Hann var svona létt-terroristalegur náungi sem hafði m.a. verið í Líbanska hernum og starfað sem lífvörður hjá olíufursta í Líbanon og kunni flest fantabrögð.
Þessir ólíku herramenn bjuggu í skemmunni sem húsverðir og gæslumenn nokkurra rándýrra eðalvagna af tegundum eins og Cadillac, Jagúar og jafnvel Rolls Royce. Stundum logaði í tunnum í skemmunni til að skapa sérstakt andrúmsloft þegar íbúarnir voru að grilla og skemmta sér innan um glæsivagnana. Þannig mátti segja að skemman væri í sérstökum háklassa.
Ekki var mikið spáð í að borga rafmagnsreikninga af skemmunni. Því kom sú stund að hið opinbera ákvað að loka fyrir rafmagnið. Tveir menn frá Rafmagnsveitunni birtust einn daginn og voru hinir vígalegustu. Skemmujarlinn hringdi strax í Ofsann sem sagðist koma sem fyrst. Á meðan beðið var Ofsans litu skemmubúar aðeins betur á komumenn. Annar þeirra var svo venjulegur í útliti að hann er þegar að mestu gleymdur. Um hinn gegnir öðru máli. Það var nokkuð þykkur durgur á miðjum aldri sem bar sig valdsmannslega. Jarlinn þekkti durginn strax en þeir höfðu nokkrum árum fyrr starfað saman sem fangaverðir í Síðumúlafangelsi. Durgur þessi hafði verið yfirfangavörður og var jafnan í yfirfíling. Sagði hann miklar sögur af sjálfum sér. Hann sagði t.d. frá því að í veiðiferðum fyndi hann það glöggt að hann væri í eðli sínu alger drápari...Sumir fanganna fyndu líka inn á það og væri það ástæðan fyrir því að þeir væru alltaf til friðs þegar hann væri á vakt...
Þegar Völundur ofsi birtist gekk hann beint að Dráparanum og tók í hann eins og hvolp og hristi hann og skók og spurði: "Hvern djöfulinn viljið þið hingað aumingjar?" Durgurinn gersamlega gleymdi drápseðli sínu í krumlum Ofsans og kom varla orði upp fyrir hræðslu...Hinn náunginn sem var alger mús sagði erindi þeirra. Á meðan Ofsinn hafði snúið sér að Músa notaði Dráparinn tækifærið og hringdi á lögguna úr gemsa sínum. Þegar Ofsinn varð var við símaganginn sló hann Dráparann létt í hausinn þannig að hatturinn flaug af honum út í skemmu og þyrlaði ryki á Rolls Roycinn...Síðan tók Ofsinn gemsann af manninum með gleymda drápseðlið og henti honum í næsta vegg.
Upp úr þessu kom löggan og var síðan lokað fyrir rafmagnið undir þeirra vernd. Dráparinn var þá enn svo lafhræddur að hann minntist ekkert á trakteringar Ofsans við sig.
Daginn eftir fékk Ofsinn mann til að tengja framhjá í næsta fyrirtæki. Léku því öll ljós í lyndi eftir það hjá skemmubúum eða þar til skemman var seld og þeir fluttu út.
| | Hugleiing: K-E | Heimild Harði diskur magisters | Dags. 2---1-2004 |
|
|
